Foarútgong mjitte en it beleanningspakket fan Musk

Marc sit dizze wike yn San Francisco, yn in kantoarstudio sûnder airco, en hat dêr fan alles leard oer it profesjonalisearjen fan in podcast. Sjoerd hâldt de boel by de grûn. In ôflevering oer wat foarútgong eins is, wat in beleanning fan Elon Musk betsjut en hoe't je oaliebollen telle.

Wat ús bliid makke. Marc hat yn 'e WhatsApp-mienskip in missy en in fyzje foar de podcast delset, in platfoarm om de Fryske kultuer te omearmjen en foarút te helpen, sûnder Sjoerd earst te freegjen. Hy organisearre ek in hurdrin lâns it wetter, sponsore dy sels mei in grutte Amerikaanske koelbox fol Gatorade en sjouwde him dêr hast in ûngelok oan. Hy rûn ek noch te hurd foar de groep, want hy moast en soe nei de Golden Gate Bridge. Sjoerd is bliid dat er wer sin hat om oan it wurk te gean, en hy hat syn earste oaliebol fan it seizoen op. Dêrút komt in nij plan: in app om oaliebollen te tellen, mei in ranglist foar de mienskip.

Polityk mei Sjoerd. Technysk binne wy fier foarút, mar betsjut dat ek dat de maatskippij better wurden is? Sjoerd wiist op San Francisco, dêr't de wichtichste ynnovaasje en in swiere drugs- en daklozekrisis op deselde pear strjitten byinoar lizze. Hy freget him ôf hoe't je ien út it Detroit fan de jierren sechtich oertsjûgje moatte dat it no better giet. Marc komt mei Steven Pinker en it Londen fan de yndustriële revolúsje. Sjoerd set dêr Singapore tsjinoer: nei de oarloch kamen se nei Londen om te learen hoe't in maatskippij wurket, mei kranten út in iepen jildkistje en aaien oan 'e dyk op fertrouwen. Syn teory is dat in goed organisearre maatskippij in protte minne ideeën opfange kin foardat immen fernimt dat it minder giet. Hy stelt dêrom oare maatstêven foar: fertrouwen tusken boargers, en oft in jong stel in hûs fine kin om in gesin te begjinnen.

Frysk nijs. Hearrenfean spile in goede wedstriid en ferlear dêrnei tsjin in ploech dy't net bêst is, wylst de klub nei ôfrin oer in penalty seure. En it tal bevers yn Fryslân is ferdûbele, al is dat noch altyd hiel bescheiden. Marc betinkt fuortdaliks hoe't bevers en Fryske diken byinoar passe.

Technology mei Marc. Tesla hat Elon Musk in beleanningspakket jûn sûnder wearga, allegear yn oandielen en ferbûn oan mylpealen foar auto's, robotaksys en robots. Marc fynt it in earlike prikkel, mei de ferplichte disklaimer dat dit gjin ynvestearringsadvys is. Coca-Cola kundige syn earste krystreklame oan dy't mei AI makke is. Marc praat oer in AI-ring om de finger en Sjoerd sjocht al AI dy't by in ûnderhanneling meilústert en advys jout, wat al bestiet. Dêrnei de belegger út The Big Short dy't tsjin twa grutte techbedriuwen ynset, en in Sineeske humanoïde robot mei in froulik figuer, dêr't Marc him net hielendal noflik by fielt.

Se slute ôf mei moppen oer wat oranjes om de hoeke. Folgjende wike wer.