de kwytrekke stimpas en de humanoïde robot

Marc sit yn Amearika en Sjoerd yn it noarden. Dizze kear in stimpas dy't de burokrasy net oerlibbet, in robot dy't by dy yn 'e hûs komme wol en in limoen dy't do noait te sjen krijst.

Wat ús bliid makke. Marc genietet fan it waar en fan it goede kontakt mei syn famylje, ek fanút Amearika. Sjoerd hat mear wurk krigen, wylst er koartlyn noch op fakânsje moast om't er te hurd wurke, en der komt in nije bril oan. Beide seagen se deselde film yn 'e bioskoop: moai filme, goede akteurs, mar nuver. Wat Sjoerd minder befoel: de Ingelske stikken wiene ûndertitele, de Spaanske net. Hiele sênes hat er sjoen sûnder te witten wat der sein waard. Marc hie yn Amearika krekt itselde.

Polityk mei Sjoerd. Nei in falske start oer fuotbal giet it oer de ferkiezings, en dat begjint by Sjoerd syn stimpas. Dy rekke kwyt, de nije dy't er op 'e tiid oanfrege kaam noait, en de âlde, dy't er letter weromfûn, wie al blokkearre. It stimburo stjoerde him nei de gemeente, en dy koe him net weromskilje. De burokrasy is sterker as de demokrasy, konkludearret Sjoerd. Dan de útslach: in grutte winner dy't wierskynlik de premier leveret, partijen dy't hielendal ferdwine en in rjochterflank dy't by elkoar opteld net lytser wurden is. Sjoerd weaget in foarsizzing foar in sintrumkabinet, dêr't de VVD by fertelt dat it op krityske punten rjochts is. Marc folge de telling nachts fanút Amearika. Oan 'e ein betinke se harren eigen partij, mar sûnder leden, want dy kinne dy fuortstimme.

Frysk nijs. Hearrenfean hold in grutte klub op gelyk, mei in lelik doelpunt. It busstasjon fan Hearrenfean moat it foarearst sûnder oerkapping dwaan, om't it te djoer wurdt. De lêste gemeente yn Fryslân dy't de winkels op snein ticht hold, giet dochs om. En der gie in foto rûn fan in oaljebol mei in bril op, dêr't Sjoerd himsels nochal yn werom seach.

Technology mei Marc. Elon Musk sjocht in telefoan foar him sûnder apps, dêr't it skerm hieltyd op 'e nij makke wurdt nei wat do op dat stuit nedich hast. Sjoerd ferwachtet foaral in ding dat dyn gedrach stjoert. Dan it grutte nijs: in humanoïde robot dy't by minsken yn 'e hûs komme moat. Sjoerd freget him ôf wat al dy minsken dogge dy't harren wurk kwytreitsje, en wa't dan noch wat keapet. Marc woe earst graach sa'n ding, dan hoegde er net mear ôf te waskjen, mar no twivelet er. Net om it uterlik, mar om de bân dy't do opbouwst mei in ding dat de hiele dei sjocht wat der yn 'e hûs bart. Fierder in ymplantaat dat bline minsken helpe moat, diken yn Frankryk dy't elektryske auto's opladen ûnder it riden, en in masine dy't wetter út 'e lucht hellet, dy't Marc sels probearre.

Se slute ôf mei moppen, wêrûnder ien oer in limoen om 'e hoeke. Dy sjochst noait, want sadree't do om 'e hoeke rinst, sit er al om in oare.