Ôflevering 8 · Seizoen 1
Atomic Habits en it brein fan Einstein
Oer dizze ôflevering
Dizze wike begjinne Marc en Sjoerd ris oars: mei in glês reade wyn en de fraach wêr't se bliid fan wurden binne. Foar Marc is dat in man op in deelskûter mei immen achterop, dy't in grutte kar fol bierkratten fêsthâldt. Foar Sjoerd is it in opromme keamer.
Lytse gewoanten, grut effekt. Sjoerd hat Atomic Habits fan James Clear lêzen. De kearn: in systeem hâldt it langer út as in doel. Wa't in moanne lang allinnich shakes drinkt, falt ôf en komt it letter wer oan. Freegje dysels leaver ôf wat foar persoan asto wêze wolst. In nije gewoante bousto yn fjouwer stappen: in sinjaal dat sichtber is, in winsk dy't it oantreklik makket, in drompel dy't sa leech mooglik is en in beleanning dy't foldwaning jout. Faak dwaan is earst wichtiger as goed dwaan. It dreechste, seit Sjoerd, is tajaan datst sels in grutte sukkel bist.
Nijs út Fryslân. Sjoerd hat Cambuur útkeazen, al sjocht er Marc tinken dat it spitich is dat it net Hearrenfean is. Cambuur stiet heech op 'e ranglist, en de jonges dreame hurdop fan Europeesk fuotbal. Dan in Fries dy't al jierren nei syn dreamfrou siket, mei in eigen website, fideo's en oproppen. Sjoerd hat in goed bedoeld advys: sykje net nei in dreamfrou, mar gewoan nei in leuke frou.
In baby op bestelling. Marc fûn in website dêr'tst in designerbaby gearstalle kinst. It is in keunstprojekt, bedoeld om it petear op gong te bringen. Do kiest it geslacht, de sykten dy'tst net wolst, eachkleur en lingte, en elke kar hat syn priis. Wa't in wiskundeknobbel bestelt, kriget der in gruttere kâns op skizofreny by. Sjoerd wit it antwurd: dy sykte hiene se dochs krekt útsetten?
Fleis út it laboratoarium. Marc wol graach ris in apparaat bouwe dat wurket as in Nespresso-masine, mar dan foar in hiele miel. Dat bringt him by kweekfleis. De see wurdt leechfiske en der komme hieltyd mear minsken by dy't ite moatte. Yn in laboratoarium kinst fleis kweke sûnder dat der in bist foar slachte wurdt. It is noch hiel djoer, mar yn Singapore mei it al ferkocht wurde.
It brein fan Einstein. Yn in boek fan Michio Kaku lies Marc dat it brein fan Albert Einstein nei syn dea troch in patolooch út syn holle helle is. It brein waard yn stikjes knipt en oan saakkundigen útdield, dy't sykje woene wat him sa tûk makke. Folle kaam der net út. Sjoerd fynt it filosofysk de raarste kar dy't der is: as it gehiel mear is as de som fan de dielen, wêrom knipst it dan yn stikjes?
Se slute ôf mei in mop dy't sels Sjoerd ferskriklik slecht fynt, en mei ekskuzes fan Sjoerd oan de harkers en oan syn mem, foar de boer dy't er nei in slok wyn sûnder warskôging de ôflevering yn liet. In wynboer, neffens himsels.