In wrâld sûnder wurk en de oare koers fan Apple

De studio wurdt ferboud, dus dizze kear sitte Marc en Sjoerd by ien fan beiden thús, mei de kat as ûnferwachte gast. It wurdt in ôflevering oer in takomst sûnder wurk, mar ek mei wolven, swannen en glêzen harde skiven.

Wat ús bliid makke. Sjoerd holp in freon by in ferhúzing: in hiele dei sjouwe mei in bestelbus dy't sa lang wie dat er twa parkearplakken nedich hie. Dêrtroch kamen se te iten by in restaurant op in yndustryterrein, dêr't minsken út de hiele provinsje sitte. It wichtichste nijs: Sjoerd hat in fêst kontrakt. Marc hat in blender oanskaft en makket no hast alle dagen wat nijs, mei resepten dy't AI him útskriuwt. Dêrby komt in film: Inglourious Basterds fan Quentin Tarantino, mei Brad Pitt. Marc riedt him fan herte oan.

Polityk mei Sjoerd. Nei reaksjes fan lústers pakt Marc de grutte fraach wer op: wat dogge wy as AI de measte banen oernimt? Syn idee is in fûns dêr't de minsken fan it lân sels de oandielhâlders fan binne, en dêr't gjin oerheid samar oer hinne stappe kin. Dat fûns soe fold wurde troch rekkenkrêft te belêsten, in lyts belang te nimmen yn grutte AI-bedriuwen, in diel fan de produktiviteitswinst op te heljen en jild te freegjen foar de gegevens dêr't modellen op traind wurde. Sjoerd hat syn bedenkingen. Moat sa'n plan net wrâldwiid, oars geane de bedriuwen gewoan fuort? En wat docht in lân mei in protte minsken sûnder wurk, bouwt it dan in grut leger? Dêrnei giet it oer betsjutting: mear tiid foar heit en mem en foar in stadiger libben. Sjoerd fynt it in rôze takomstbyld en wiist derop dat fakbûnen har ûnderhannelingsposysje kwytreitsje. Har konklúzje is nuchter: set wat jild oan 'e kant en ynvestearje yn freonen en famylje.

Frysk nijs. In fytster waard efterfolge troch in hûn dy't de pedaal te pakken krige, en dy krige in flinke trap. De provinsje hat de subsydzje foar wolwearende maatregels krekt ferhege, en Marc fertelt hoe't se yn Teksas wylde swinen út in helikopter wei bestriden. Minder grappich is de fûgelgryp, dy't no oerslein is nei gansen en swannen. Op guon dagen lizze der in protte deade swannen lâns de dyk.

Technology mei Marc. Wittenskippers ûndersykje oft fjoertornado's oaljelekkaazjes op see opbaarne kinne, wat Sjoerd fuortendaliks op in grap oer Windows bringt. Microsoft wurket oan opslach yn glês dy't ieuwen meigiet sûnder stroom. Wylst oare techbedriuwen tûzenen miljarden yn datasintra stekke, liket Apple yn te setten op effisjintere modellen dy't gewoan op in telefoan draaie. Marc is der optimistysk oer, mei de disklaimer dat it gjin ynvestearringsadvys is. As lêste in lyts apparaatsje dat mikrofoans yn 'e buert ûnbrûkber makket.

Se slute ôf mei moppen, in fuotbalriedsel oer in ferneamde reddingsaksje en it advys om alfêst tulpebollen yn te slaan.