De moderne katedraal en twatalige ferkearsboarden

Marc is werom út Silicon Valley en hâldt fol dat jetlag allinnich foar katten is. Sjoerd sit mei in neus fol snot, mar hat wol in monolooch klearlein. It wurdt in ôflevering dy't by in digitale typmasine begjint en by in robot mei in BB-gun einiget.

Wat ús bliid makke. Sjoerd is bliid mei syn nije digitale typmasine: in toetseboerd mei in hiel lyts skermke, dat neat oars kin as type. Wat er skriuwt, giet fia wifi streekrjocht nei Google Drive of Dropbox. Underweis betinke de jonges ek noch in eigen cloudtsjinst mei kwantumfersifering, al is dat foaral in merknamme.

Polityk mei Sjoerd. Sûnt de Ferljochting hawwe minsken it tradisjonele tinken foar in grut part efter har litten, seit Sjoerd, en no rinne in soad efter jild of eindeleaze selsûntdekking oan. Ieuwen lyn bouden minsken katedralen, mei in beroerd rendemint, mar wa't deryn stiet, fielt dat it wat mei him docht. Marc neamt de kwantumkompjûter en nije chips, foar wa't betsjutting siket yn technyk. Sjoerd is net oertsjûge: in raket fan Elon Musk dy't wer opfongen wurdt is knap, mar it rekket de siel net. Syn djippere punt: moderne ideeën jouwe ús gjin wurden om technyk te feroardieljen dy't skea docht, lykas sosjale media foar bern, wylst Mark Zuckerberg syn eigen bern der fan fuort hâldt. Keppelje moderne technyk wer oan tradisjonele waarden, en dan kinne je miskien wer in katedraal bouwe. Marc bliuwt optimist en wiist derop dat tsjerken ek boud waarden om macht sjen te litten. Sjoerd syn tip foar de harker: lês âldere tinkers, mei in rikere byld fan de minske.

Frysk nijs. Hearrenfean wint út by Sparta en bliuwt kreas yn de middenmoat. Wiebe Wieling stopt as foarsitter fan de Alvestêdetocht, sûnder dat er ea in tocht organisearje koe. De provinsje presintearre twatalige ferkearsboarden, mei it Nederlânsk boppe en it Frysk derûnder. Sjoerd freget him ôf wat dat helpt as safolle minsken min lêze kinne. Marc hat it antwurd al klear: in tûke pen. As ekspert yn digitale pennen moat er der sels ek om laitsje.

Technology mei Marc. By in bekende makker fan humanoïde robots waard in meiwurker ûntslein nei't dy warskôge hie dat de robot krêft genôch hat om in skedel te kraken. Gemini rint hurd yn op ChatGPT, benammen troch it meitsjen fan ôfbyldings. Apple ferliest AI-talint oan Meta en Google. In YouTuber krige syn robot mei rollespul safier dat dy him mei in BB-gun skeat. En McDonald's yn Nederlân luts in krystreklame dy't folslein mei AI makke wie, te kâld en sûnder emoasje. Neffens Marc it bewiis dat minsken siel wolle, ek yn technyk.

Se slute ôf mei in pear moppen en winskje elkenien in wike fol freugde.