Frijheid yn in plurifoarme maatskippij en in útkyktoer

Dizze ôflevering begjint mei Tibetaanske kielsang en einiget mei in flagge dy'tst nea sjen silst. Dêrtusken in serieus pleit fan Sjoerd, in útkyktoer dêr't de jonges sels mar fêst in offerte foar opfreegje, en in kompjûter dy't dyn wurk oernimt.

Wat ús bliid makke. Sjoerd hat in soad op 'e fyts sitten. Hy trainet net foar in maraton, seit er, mar tsjin de útdijing fan himsels. Dêrneist is er fan syn matras ôf, en dat gie fia it balkon. No sliept er op in rolmatras mei kapok deryn, en hy hat folle minder lêst fan 'e rêch. Marc wie bliid mei de kilometers dy't er ôflein hat en it gefoel dat er sa nei Sina rinne koe. Fierder sit er hielendal yn Breaking Bad.

Polityk mei Sjoerd. Sjoerd hie in lang stik skreaun. Stel dy in maatskippij foar dêr't hast elkenien wat om it midden hinne tinkt. Dan giet in debat oer abortus net oer de fraach oft it mei, mar allinne oer oant wannear. Steane de opfettings fier útinoar, dan moat de oerheid kieze, en dat is yn in demokrasy noch prima. It gefaar sit him yn wat dêrnei komt: in groep dy't as bern op it skoalplein nei de juf draaft en freget oft de oaren har mûle hâlde moatte. Wa't de oerheid dy macht jout, ferjit dat itselde ynstrumint de wike dêrop tsjin him brûkt wurde kin. As foarbyld neamt Sjoerd it demonstraasjerjocht by abortusklinyken, dat ûnder druk stiet. Syn konklúzje: wa't in frije maatskippij wol, moat foaral opkomme foar minsken dêr'tst it net mei iens bist.

Frysk nijs. Staatsbosbeheer wol in nije útkyktoer bouwe, mar sammelet dêr sels jild foar yn. De jonges belje live ien op dy't sokke dingen bout en ûnderhannelje oer de priis per meter. Anneke Dijkstra fytst mei yn de Tour de France foar froulju, foar de ploech fan VolkerWessels. Yn ien etappe mei se miskien foar eigen súkses gean. En wa't troch Ljouwert struntet, kin mei in kaart op syk nei lytse figuerkes yn de steechjes.

Technology mei Marc. Marc hat lêzen oer it plan om raketten te brûken foar reizen op ierde, sadatst yn in omsjoch fan Parys nei New York bist. Hy hâldt fol dat it idee earst fan him wie. It grutste probleem is it lawaai. Fierder komt de app mei hiele koarte filmkes dy't der foar TikTok wie miskien werom, en is der no in ChatGPT-agint dy't op dyn kompjûter taken oernimt, lykas in flecht boeke.

Se slute ôf mei moppen, en Sjoerd leit út wêrom'tst in reade flagge om 'e hoeke nea sjen kinst. Dy sit altyd om in oare hoeke.