It boek oer Elon Musk en in kickbokser yn de polityk

Twa jier lyn kaam de earste ôflevering fan Twa Ûnnoazele Jonges út, en neffens Marc is de podcast sûnttiids better wurden. Of teminsten minder min. Marc hat yn 'e sportskoalle nije rekords set en wol dizze wike in grins oer dêr't er al jierren mei yn 'e holle sit.

De Knypster merke. Sjoerd wie op 'e merke yn De Knipe en genoat fan it feest. Ynwenners bouwe dagenlang oan praalwagens dy't efter in trekker troch it doarp geane, mei folk der neist. Guon hiene it gesicht swart sminkt, net as Swarte Piet, mar gewoan om't it by harren kostúm hearde. Yn Amsterdam soe dat fragen yn 'e gemeenteried opsmite, seit Sjoerd, hjir is it gewoan feest.

Polityk sûnder útlis. Hugo de Jonge reagearre yn 'e Keamer op in wetsfoarstel fan FVD oer it referindum. Frege om út te lizzen wat der ynhâldlik net oan klopte, kaam er net fierder as it wurd komplotretoryk. Sjoerd neamt it de skoalpleinstrategy: immen in sukkel neame en der dan net mear op yngean. Dan is der in kickbokser dy't op in kandidatelist foar de ferkiezings stiet, al sa leech dat er allinnich mei foarkarsstimmen yn 'e Keamer komt. Marc wol him wol stypje, mar net foar him stean. Efter him, dat wol. En de Fryske keeper dy't op it WK yn Katar sa opfoel, falt bûten de Oranje-seleksje. Leit it oan syn prestaasjes of oan it feit dat er Fries is, freget Sjoerd him ôf. Marc hâldt it op kompetinsje.

Miljarden foar AI. Marc fertelt oer Anthropic, in AI-bedriuw dat in grut bedrach oan ynvestearring krige hat en dêr't Google noch mear jild yn stekke wol. Wêr giet al dat jild hinne? Nei rekkenkrêft. Wa't in model traine wol, hat GPU's nedich, en dy binne no hast net te krijen. Fia robottaksy's yn Kalifornje, dy't ek yn in simulearre wrâld leare, komt er by de fraach oft modellen dy't op keunstmjittige data traind wurde de rommelige minske noch wol begripe. Sjoerd tinkt dat wy ús dan mar as masines gedrage moatte. Marc fynt dat net iens sa'n gek idee, Sjoerd freget him ôf wêr't wy de minske dan foar optimalisearje.

De biografy fan Musk. Marc hat de biografy fan Elon Musk út. It ferhaal dat him it meast bybleaun is: om kryst hinne beslút Musk ynienen dat in datasintrum fan Twitter ferhúzje moat. Mei in pear meiwurkers lûkt er sels de servers út 'e rekken, hy hiert frachtweinen en keapet in bouwmerk leech om alles fêst te setten. Marc lies earder it boek oer Steve Jobs fan deselde skriuwer, mar Musk is in oar soarte sjeny: altyd gas, en hy wit wat syn yngenieurs dogge, oant de koade ta. Hy riedt it boek oan, ek foar wa't net fan Musk hâldt.

Se slute ôf mei in pear moppen. Op nei it tredde jier.