Ôflevering 21 · Seizoen 1
De draak op it bêd en de takomst fan augmented reality
Oer dizze ôflevering
Wylst der minsken op it dak oan it wurk binne en it plafond kreaket, prate Marc en Sjoerd troch. In ôflevering dy't begjint by in berneboek en einiget by de fraach hoefolle technology wy eins ha wolle.
In bril op by mem. Marc wie in wykein by syn âlders. In bedriuw út Grins hat foar de wurkjouwer fan syn mem in virtual reality simulator boud om masines te betsjinjen, en dy mocht mei nei hûs. Marc sette him syn mem op 'e holle en dy wie fuort wei. Syn les: lit âldere minsken allinnich sjen, want mei kontrollers yn 'e hannen troch in romte bewege, dat begripe se net. Sjoerd hat in tentamenwike achter de rêch en moat no oan syn skripsje.
De draak op it bêd. Sjoerd hat in Ingelsk berneboek meinommen. Billy fynt in lytse draak op syn bêd, mar syn mem seit dat draken net besteane. De draak groeit oant syn kop yn 'e badkeamer sit en syn sturt by de telefyzje, en op it lêst rint er mei it hiele hûs fuort. Pas as mem tajout dat der wol in draak is, wurdt er wer lyts. Marc konkludearret dat mem de haadrol hat. Sjoerd hat in eigen tapassing: hy giet al syn problemen ûntkenne, sadat er as alles ynstoarten is sizze kin, sjochst wol, eigen skuld.
Derby en in nepakkount. Yn it Fryske nijs earst de derby fan it noarden, dêr't Sjoerd de skuld foar it gemak by de supporters út Grins leit, sûnder de feiten nedich te hawwen. Dan de rel yn de Provinsjale Steaten. In Steatelid fan de VVD hie in nepakkount oanmakke yn 'e namme fan de FNP en stapte op doe't dat útkaam. In partijgenoat hie der ek berjochten fan pleatst, mar de partij neamt it in solo-aksje. Sjoerd fynt dat tige tafallich.
Genen, robots en geuren. Marc fertelt oer de Sineeske wittenskipper dy't de genen fan in twilling bewurke hie en no wer frij is, wat in diskusje oer etyk oplevert. Dan in robot dy't in pop in sikehúsjas oanlûke kin, dreger as it liket, om't sêfte stof op einleaze manieren falle kin. En Sweedske ûndersikers lieten minsken út ferskillende kultueren geuren rangskikke: kultuer ferklearre mar in lyts part. Sjoerd neamt wat oars dat universeel stjonkt, The Masked Singer, en ropt de sjoggers op om fuort te klikken.
Augmented reality. Marc leit it ferskil út tusken virtual en augmented reality, fan Pokémon Go oant in telefyzje dy'tst mei in app yn dyn keamer sjen litst. Hy sjocht in wrâld fol datapunten: in produkt yn 'e winkel oantikke foar resinsjes, in gesicht werkenne en daliks in freonskipsfersyk stjoere, sensoren dy't dy yn 'e sportskoalle advisearje. Sjoerd sjocht bedriuwen mei psychologen en grutte budzjetten dy't dyn priis ôfstimme op dyn hertslach, en dêr ferliest it yndividu altyd fan. Syn advys: gean in eintsje troch it bosk, yn it echt.
Se slute ôf mei in pear moppen, wêrûnder ien oer in faas dy't allinnich servys praat.