De AI-wekker en de syktocht nei in nije premier

Marc hat in nije wekker dy't him nachts beharket, en Sjoerd hat in rûnetiid dêr't er it net oer hawwe wol, mar it dochs hieltyd oer hat. Dêrnei geane se fan de formaasje yn Den Haach nei hagel yn Bûtenpost en de lêste streken fan 'e techwrâld. In ôflevering oer folwoeksen wurde, teminsten foar efkes.

In wekker dy't meiharket. Marc hat in app ûntdekt dy't mei help fan AI dyn sliep folget en dy sêft wekker makket op it momint dat dyn lichem der klear foar is. Nei de earste wike is Marc entûsjast. It nuverste is dat de app lûden fan 'e nacht opnimt en de oare moarns ôfspilet. Dat er in jûn earder foar it earst ea in bier stean litten hie, sil ek holpen ha.

Rapst op 'e kartbaan. Sjoerd wie op in frijgezellefeest dat begûn op 'e kartbaan by Hearrenfean en einige mei iten yn in restaurant dêr't neffens him neat feroare wie sûnt syn foarige besite. By it karten giet it fansels net om winnen, beklammet er. Dat er de rapste rûne ried, wol er allinnich even sein ha, foar de skiednis. En dan noch in kear. En letter yn 'e ôflevering noch in pear kear.

Wa wurdt premier. Sjoerd fertelt hoe't in kandidaat foar it premierskip ûnderút gie foardat er offisjeel foardroegen wie. Wa't it dan wol wurdt, witte se net. Wol biede se harsels oan: Marc is reedlik yn foarm en kin him ynternasjonaal rêde, en Sjoerd hat tiid en, sa't er noch even meidielt, de rapste rûne op 'e kartbaan. Dêrnei it ferhaal fan in man dy't in Nederlânske politikus yn Belgje mei in paraplu op 'e holle sloech en net ferfolge wurdt, mar in warskôging krijt.

Hagel yn Bûtenpost. Yn Bûtenpost kaam safolle hagel yn ien kear del dat it rioel it net mear oankoe, en in wensoarchsintrum stie foar in grut part ûnder wetter. Sjoerd leit it út mei in plestik sekje fol wetter. In foto fan in oerstreamd húske helle sels it lanlike nijs, en dat húske blykte fan Sjoerd syn beppe te wêzen. En in grutte Fryske famylje stiet mei-inoar yn it Guinness Book of Records.

Pixar, AI en pizza. Marc syn techupdate begjint by Pixar, dat in grutte ûntslachrûne oankundige. Dan AI-hardware: in start-up brocht in lyts apparaat út dêr't fragen oan stelle kinst, en krige flink krityk. Sjoerd freget fuort oft Marc mei de Nuwa-pen net bang is foar itselde lot. Dêrnei in ûndersyk út Sina dêr't befrêzen harsenwêfsel wer ûntteid waard en noch wurke. Fierder de rel om in stim fan OpenAI dy't wol hiel bot op dy fan Scarlett Johansson like, en de AI fan Google dy't oanriedt om lym oan 'e pizza te dwaan en stiennen te iten.

Se slute ôf mei in pear moppen, en de folwoeksenheid dêr't de ôflevering mei begûn, is tsjin it ein wer hielendal fuort. Sa kenne we se.